Lávdan Sámi Arena

Sámi arena gos ságastallat, digaštallat ja ovdánahttit

Geassemánu 10.-15. b 2025, Guovdageainnus

Bures Boahtin Lávdan Sámi Arenai

Lávdan Sámi Arena lea sadji sámi siviilaservodahkii gos sáhttá čoahkkanit ságastallat, digaštallat ja ovdánahttit. Dát lea siviila servodaga organisašuvnnaid, ásahusaid ja politihkkáriid deaivvadanbáiki, ja prográmma leat sii ráhkadan iežaset dárbbut mielde.

Vuosttaš Lávdan Sámi Arena lágiduvvo geassemánu 10.-15. b. 2025, Guovdageainnus Norgga beale Sámis.

Geavatlaš dieđut ja dávjá jerron gažaldagat

Movt oassálastit

Dieđihanáigemearri lea miessemánu 9. b.

Oassálastimii gáibiduvvo dieđiheapmi.

Lávdan Sámi Arena lea rabas olles Sápmái searvat, juogo beare čuovvut prográmma dahje lágidit doaluid. Lea rabas sihke ovttaskas olbmuide ja organisašuvnnaide miehtá Sámi. Rájáidrasttideaddji perspektiiva lea dehálaš oasssi Lávdan Sámi Arenas, ja plánenjoavku sáhttá veahkehit dahkat rádjerasttideaddji ovttasbarggu vejolažžan.

Sámi organisašuvnnat, ásahusat ja earát ávžžuhuvvojit lágidit doaluid Lávdan Sámi Arenas. Jos dus leat gažaldagat dahje jurdagat, de áinnas váldde oktavuođa lavdan@saamicouncil.net

KulturSápmi & DutkanSápmi - Dieđavahkku

KulturSápmi 2025 ja vuosttaš DutkanSápmi-Dieđavahkku lágiduvvo Lávdan Sámi Arenas.

KulturSápmi lágiduvvo 10.-12.06. Dat lea sámi kultur- ja dáiddabirrasiid deaivvadanbáiki, ja lea šaddan sámi kultursuorggi jahkásaš oaivádeapmi. KulturSápmi lea vejolašvuohta nannet oktavuođaid, ja viiddidit fierpmádagaid kulturbargiid gaskka rastá riikarájáid ja surggiid.

DutkanSápmi – Dieđavahkku lágiduvvo 10.-13.06. Dat lea ođđa konseapta sámi dutkiide. Dat lea dakkár arena mii ovddida lagat oktavuođaid sámi dutkanbirrasiid gaskka rastá ásahusaid ja riikkarájáid rastá.

KulturSámis, DutkanSápmi – Dieđavahkus ja Lávdan Sámi Arenas leat oktasaš registreren ja mii bivdet du čilget makkár lágideapmái don servet.

Eanet dieđuid ja eavttuid KulturSápmái ja DutkanSápmi – Dieđavahkku searvamii gávnnat sin ruovttusiidduin.