Mii lea Lávdan Sámi Arena

Lávdan Sámi Arena lea sadji gos sámi siviilaservodat sáhttá deaivvadit beroškeahttá suorggis dahje riikkarájáin. Das sáhttá digáštallat áššiid mat gusket Sápmái, ja nu ovttas bargat buori boahtteáiggi ovddas.

Lávdan Sámi Arena lea oassin Interreg Aurora ruhtadan prošeavttas ReCap ASáp: Regaining capacity in a changing Sápmi, man Sámiráđđi ja Suoma Sámiid Guovddášsearvi jođihit. Prošeavtta ulbmil lea nannet sámi siviilaservodaga, ja buoridit kapasitehta nu ahte sáhttit aktiivvalaččat searvat mearridanproseassaide mat váikkuhit Sámi. Loga eambbo prošeavtta birra DÁS.

Lávdan Sámi Arena plánenjoavkkus leat mielde ReCap ASáp:a prošeaktajoavku.

Lávdan Sámi Arena vuođđun lea doalut nugo Almedalsveckan Ruoŧas, SuomiAreena Suomas ja Arendalsuka Norggas. Siviilaservodaga organisašuvnnat ja ásahusat bovdejuvvojit lágidit doaluid mat leat dehálaš fáddán ja áššin sidjiide. Lávdan Sámi Arena veahkeha láhčit daid, dasa lassin maiddái movttiidahttá organisašuvnnaid ovttasbargat. 

Buot lágideamit leat mielde Lávdan Sámi Arenas, ja go leat registrerejuvvon Lávdan Sámi Arenas, de lea vejolaš oasálastit máŋga iešguđetlágan doaluin. Muhtun doaluin leat dihto ulbmiljoavkkut, dahje leat dušše bovdejuvvon gussiide. Dát boahtá čielgasit ovdan prográmmas.

Rájáidrasttideaddji perspektiiva lea deaŧalaš Lávdan Sámi Arenai. Miehtá Sámi organisašuvnnat ja ásahusat leat bovdejuvvon. Mii maid ávžžuhit rájáidrasttildeaddjii ovttasbargui.

Lávdan (substantiiva): go eallu leavvá ja guohtu miehtá dihto guovllus várrejuvvon áiggis. Substantiiva lea suorgásan sánis Lávdat (vearba): eallu leavvá ja bohccot eai leat bálddalagaid.

Sáni lávdan nuppe gežiid lea bieđganit, “hággánit, šaddat máŋgga oassin”. Sánit lávdat ja bieđganit sáhttet mearkkašit seamma, jus dušše čilge ahte eallu ii leat čoahkis. Erohus lea ahte lávdan sátni lea positiiva delhi ja mearkkaša ahte guođđoheaddji diktá ealu ieš leavvat mearriduvvon báikái. Bieđganit lea fas negatiiva dilli go eallu hággána máŋgga čorragin guođoheaddji dáhtu haga. 

Lávdan lea doaba mii ovdal lea váldojuvvon atnui čilget sámi siviilaservodaga, nugo Tråante 2017 oktavuođas, dalle go vuosttašamanueansa Mikkel Nils Sara doalai TED Talk mas čilgii doahpaga.

Jus jurddašat ahte olles Sápmi lea guohtunguovlu, ja álbmot lea eallu, de álbmot lea lávdan miehtá riikka. Juohke suorggis leat iešguđetlágan dárbbut, ja iešguđetlágan dárbbut mearkkašit ahte mis leat iešguđetlágan vuogit movt daid dárbbuid ollašuhttit. Go lea ráfálaš ja soabalašvuohta, de sáhtát ovdánit. Muhto go juoga dáhpáhuvvá, ležžet dal buorit dilálašvuođat nugo beassážiid, dahje fuones dilálašvuođat nugo miellačájáhusat, dalle mii čoahkkanit. Nu lea Sápmi doaibman. Dábálaččat mii leat lávdan, muhto go lea dárbu, de mii čoahkkanit. Lea dát mikrokosmos maid LÁVDAN SÁMI ARENA háliida ráhkadit.